Opphaveleg vart denne dagen feira til minne om den heilage Valentin, som plukka blomar i klosterhagen, og gav til par som var forelska i kvarandre. Dette er forelskinga sin dag, dagen for romantikk, følelsar, kjærleik og den djupe venskapen; og den kjem som det fyrste vårteikn i den kalde årstida.
Få delar av livet vårt har så mange dimensjonar og er så kompliserte som relasjonane våre. Dette er ein livslang læring. Difor er det viktig med slike «relasjonshøgtider» som Alle hjartas dag, morsdag, farsdag og bryllaupsdagar. Desse dagane er sjølvsagt ikkje noko alibi for å slurva med relasjonane resten av året, men som lyskastarar som set fokus på noko av det viktigaste me har: fellesskap med våre næraste.
Blir desse dagane brukte rett, kan dei hjelpa oss til å bli synlege for kvarandre. Og om me stoppar opp på desse dagane, så vert det synleg korleis relasjonen ser ut – på godt og vondt. Då kan dei bli utganspunkt og utvikling av relasjonar som på sikt var trua.
Gåvene me gjev kvarandre på Alle hjartas dag er symbol på det innarste i kjærleiken: at kjærleik er å gje.
Kanskje er det difor at kjærleikens dag hamnar på ein martyrdag – Valentin døydde for trua si. At rosa, symbolet på kjærleiken, både har den vakraste blomen og dei kvassaste piggane er ikkje tilfeldig. Sann kjærleik kostar – eg må gje av meg sjølv. I kjærleikrelasjonen får me mykje av den andre, som ei god oppleving. Så fort det vert eit krav, sluttar det å vera kjærleik, for kjærleiken er i sin natur alltid fri.
Ta godt vare på kvarandre!
Roald Drønen
Sokneprest
